Ua lua palota faapolokiki sosoo o mafai e le National ma le ACT ona ausia nofoa la te osia ai se faigamalo.
O le faaiuga lea o le palota faapolokiki a le 1News na faailoa mai anapo, ma e ui o lea e lua points na pa’ū ai le National, ae faaopoopo le tasi mo le ACT, i le tuufaatasiga e maua e le National le 46 nofoa ae 15 le ACT ma maua ai nofoa e 61.
Mo le Labour e lua points na pa’ū ai mai le palota o Iuni, alu i luga le Greens faapea le pati a Maori, ma a tuufaatasi le toatolu lea – e maua ai nofoa e na o le 59.
Ae mo le Palemia e fiafia iai tagata, o loo tumau pea Chris Hipkins i le tulaga muamua, sosoo atu iai Christopher Luxon o le National.
O le toatele o tagata na fesiligia i le palota lenei a o faamaopoopo ai i le vaiaso talu ai, o loo finauina ua tatau ona iai se system e fai tutusa uma ai lafoga totogi a tagata Niu Sila faapea ai ma le tatau ona totogi lafoga o capital gains.
