Ua sauni nei se tasi tamaitai mai le Gold Coast ua feta’ua’ina lona faatagā gasegase i le kanesa ina ia poketi ai le faitau afe o tupe o fesoasoani e tuuina atu mai le komiuniti, ae o lea ua sauni nei e tulai i le faamasinoga.

O Olivia Ward lona suafa ma sa faigaluega i se Childcare Center ia Fepuari tausaga na tea nei ma sa ia faailoa i tagata sa o latou faigaluega o ia ua maua i le kanesa.

Sa ia faafuga lona lauao ma ua atili talitonuina ai e tagata.

Na lipotia e le 9News na o ane tagata o le komiuniti ma ofo ane le latou lagolago ma faia ai se sailiga tupe i se aoga i lo latou lotoifale, e oo lava i nai tamaiti sa ia aoaoina sa ofo ane iai tupe mai a latou piggy banks ona o le alolofa iai e pei ona faailoa e le pule o le nofoaga sa faigaluega ai lea tamaitai.

Fai mai a tuufaatasi e 18 afe se vaegatupe na mafai ona mauaina ma tuusa’o loa i lea tamaitai peitai o lea ua feta’ua’ina e leoleo e lē moni le kanesa o Olivia ma sa le tatau ona ia aveina foai sa tuu atu e tagata.

Ina ua fesiligia e le 9News lea tamaitai i tuuaiga faasaga ia te ia, sa ia tali ane e leai sana faamatalaga e fia faia, o le vaiaso fou e tulai ai i le faamasinoga.