O le lesitala ai i Samoa i le matāgaluega o alamanuia, pisinisi ma leipa o le kamupani o le WILCO Ltd ma faagaioia ai ana pisinisi o le aumaia mai fafo o oloa faufale ma faatau atu i lo tatou atunuu, ua faatupu popole i pisinisi faapea o loo tautuaina lea vaega o oloa mana’omia i galuega.
O le WILCO o se pisinisi mai Vanuatu ae o se kamupani o lona aufaisea poo i latou o loo lotolotoi i le pulea ma le faagaioia e iai sootaga i le malo o Saina.
Ua faailoa e lipoti le iai o atugaluga i nisi o pisinisi i le atunuu ona e lē fesiligia le malosi tau tupe o le WILCO e mafai ai ona latou faapa’ū maualalo tau o a latou oloa ma aafia ai a latou pisinisi.
O le tasi o atugaluga o le ono oo atu o le malosi o lea kamupani e aumai ai isi ituaiga o oloa ma faafaigatā ai le itu faatauvaga i le va o pisinisi.
Ua valoia o nisi o kamupani tetele o loo umia e o tatou tagata o le a matuā afaina ai.
Ua faailoa e se molimau o loo silasila nei le vaega o le Matāgaluega o Alamanuia, Pisinisi ma Leipa o loo gafa ma le lesitalaina ma le faamatuuina atu o laisene o pisinisi mai fafo i se faaseā ua faato’ai iai a pisinisi i Samoa o loo iai o latou popolega i le oo mai o le WILCO i lo tatou atunuu.
