Ua i luma nei o le Faamasinoga Maualuga a le atunuu se talosaga ua toe apili ai le faai’uga a le Faamasinoga Faaitumalo na talia ai le talosaga a loia a leoleo ina ia faataoto ni aiaiga e tatala ai i tua le sui Faipule o Gagaifomauga 3 o le ta’ita’i o le vaega faaupufai o le Faatuatua i le Atua Samoa ua Tasi, le susuga Laauli Leuatea Poalataivao Fosi Schmidt.

O le vaiaso nei na valaau ai lea talosaga ina ia toe iloilo ai aiaiga na tuuina mai i se faai’uga a le tamaitai faamasino o le Faamasinoga Faaitumalo le afioga Talasa Atoa Saaga, lea ua taofia ai le Tusifolau o Laauli, saini i le ofisa o leoleo, ma taofia le toe faaaogā o fesoota’iga faaonaponei le social media.

Ua fautuaina foi le sui faipule e taofia le taumafai e fesoota’i i molimau a leoleo.

O aiaiga nei e mafua mai i moliaga o loo tuua’ia ai le susuga Laauli lea ua ia teena.

O le vaiaso a sau e aumai ai se finagalo o le Faamasinoga Maualuga i se aso e iloilo ai lea talosaga apili.