E toe to’alima isi tama talavou o loo sailia e leoleo i Sini ona o le faalavelave na osofa’ia ai foi se isi tama a’oga i le aso ananafi, faaaogā ai se auupega ma’ai e talitonuina o se naifi, tulou.  

O loo lipotia e le 9News o le vevesi lea na tupu i se a’oga i le itu i Saute i Sisifo o Sini ma na faailoa i luga o televise ata o le vevesi lea na pu’eina e nisi, ae fai mai na mafua le vevesi ona o se tamaitai.  

E to’atolu alii talavou na aveina atu i le falema’i i le aso ananafi mo togafitiga ma ua toe tete’a i o latou aiga, e to’alima foi isi talavou pe ā ma le 15-16 tausaga le matutua na p’ueina e leoleo ma na tutula’i i le faamasinoga i le asō. 

Fai mai leoleo o le isi to’alima o loo sailia ua iloa e leoleo ma ua valaau ai ia i latou ia e sili ai le aga’i ane i le ofisa o leoleo i Bankstown e faafaigofie ai le mataupu. 

Fai mai leoleo na amata i le fusuaga a alii talavou e to’alua e mafua i se tamaitai ma faifai tetele ai.  

O loo faaauau su’esu’ega.