Ua iai nei le fuafuaga a le Pulega o malaevaalele a Samoa e siitia nisi o totogi o ana auaunaga e pei o le totogi o le lafoga mo pasese e tuua le atunuu le Departure Tax, le totogi e tutū ai taavale i le malaevaalele i Faleolo o loo pulea e lea auaunaga a le Malo, ma le totogi o le puipuiga le security ma le totogi o le faaaogāina o le nofoaga fou e faaee ma taunuu ai malo taualoa poo le VIP terminal.

O le tāua o le auai o le lautele o le atunuu i faatalatalanoaga o le a faia i Upolu ma Savaii o le a maua ai e lea pulega se tulaga o taoto ai finagalo o tagata i lo latou lagolago, poo le teena o ni siitaga o totogi o a latou auaunaga e pei ona faailoa atu.

O le Aso Lulu o le vaiaso nei e faia ai le feiloa’iga ma le atunuu i Upolu i le maota o le Tooa Salamasina i Sogi, ae mo le motu o Savaii o le ofisa o le matagaluega o tinā ma tamaitai atina’e o afioaga ma agafesoota’i i Salelologa e faia ai i le Aso Tofi o le vaiaso nei.