E 25 tausaga o le soifua o le tamaitai o Maddison-Lee Wesche, o se tamaitai mai sona tupuaga Samoa na soifua ane i Niu Sila, lea ua ia ‘ulaina le pine siliva mo Niu Sila i le tauvaga a le Olimipeka o le togiina o le pulu mamafa poo le shot put!
I sana faatalanoaga ma le Stuff na saunoa ai Maddi, “O lo’u mitamitaga ona o a’u o se tamaitai Samoa i Niu Sila. Ua matou lē o toe mafuta ma si o’u tamā, ae o lo’u fiafiaga sili ona ua ou faia se mea e mautinoa lona mitamita ai i lana aganuu.”
O Maddi sa amata lava ona mulimuli atu i le tamaitai foi na ta’uta’ua ai Niu Sila i lenei lava taaloga, Dame Valerie Adams, lea sa la tausinio faatasi i taaloga o le Olimipeka i Tokyo i Iapani i le tolu tausaga talu ai, ma na tulaga ono ai Maddi i le faasologa.
Ae o le Olimipeka la o le tausaga lenei, ua tulai mai ai Maddi i le tulaga lua, ma manumaloina ai e Niu Sila le pine siliva, i le tauvaga faaiu o le togiina o le pulu mamafa i le vaega o tamaitai.
O le taaloga lenei na manumalo ai foi le tamaitai Niu Sila o Dame Valerie i pine auro e lua, tasi le pine siliva ma le pine apamemea e tasi, ae o lenei foi la ua amata ona solisoli muliaao atu iai Maddi, o se isi foi tamaitai Pasefika o loo faaauau pea ona latou manumaloina pine o le Olimipeka i lenei lava taaloga.
