E leai se lipoti tele mai leoleo e tusa ma leoleoga o le tapuaiga a Samoa i Aukilani i ni itu na faaletonu, seia vagana ai le toatasi lea na ave i le vaveao ananafi.
O se faaiuga o le vaiaso pisi tele na iai i Aukilani i Saute ma e lei mafai e le faaiuga o le taaloga ona suia le lagolago faapea le mitamita o tagata Samoa i ana tamafanau.
E ui la na tele ina sologa manuia fiafiaga ma usitai le toatele, e na o le toatasi le alii na ave faamalosi e leoleo i le vaveao ananafi i Otara ma i molimau i tala a le 1News na mafua ina ua musu lea alii e ave i leoleo le fagu ava malosi na ia umia.
I le ata video ua toe salalau nei o loo maua ai tauiviga a lea alii ma leoleo ma o loo maua ai se tasi o leoleo na ia taumafai e tatu’i.
A o fai mai ai leoleo e le mafai e le ata video ona maua ai le atoaga o le mea na tupu, peitai mai ia Jill Rogers o le ofisa leoleo i Manukau e lei fetaui nisi o amioga a leoleo na faia.
Mai ia Rogers o le a faatalanoa e le ofisa leoleo aafia.
E ese mai i lenei mataupu, na sologa lelei ma manuia le tapuaiga a Samoa e le gata i Aukilani ae faapea le tele o vaega o le atunuu.
