Ua leai se suavai mamā mo le taumafa mo nai tagata e aumau i le Far North Queensland ma ua faamaonia lea tulaga i se faaaliga na tuu ane e le Hinchinbrook Shire i tagata o le taulaga o Ingham i le taeao analeila, lapata’ia ai ua lē toe saogalemu le suavai paipa i le taumafa.

E lē mailoa se taimi e mae’a ai galuega lipea o loo faagasolo ma o loo ave iai le faamuamua pei ona ta’ua i le lapata’iga.

O se tulaga atili faigatā mo tagata pe ā ma le 4500 e aumau i ia faaitu.

O le aso ananafi na kiliva ane ai e se helicopter a le vaega o le puipuiga se generator poo se afi ina ia faaauau ai pea ona faagaioi nisi o fuafuaga.

Ua to’alua tagata ua lipotia ua maliliu mai lōlōga o loo feagai nei ma lea itu o Ausetalia ma ua amata ona faaitiitia pe faalēaogāina foi fautuaga ma lapata’iga o uiga loulouā o le tau a o alo ane nai tagata i le faamamāina o mea ua faaleagaina.

Ua saogalemu le toe foi o tagata i o latou fale ma ua amata foi ona toe tatala supamaketi tetele.

O vaalele helicopters a le vaega o le puipuiga a Ausetalia o loo sapalaia ane oloa ma uta i lea faaitu e fesoasoani ai.

Puna o Faamatalaga: https://www.9news.com.au/national/queensland-flooding-update-residents-face-cleanup-after-deluge-eases/f79fcf4d-27fd-4f62-9793-892a1b0c2dd6