E to’a sefululua tagata mai le nuu o Lefagaoalii i Savaii ua latou ioeina le moliaga o le ave faamalosi o se tagata e aunoa ma se maliega o lea tagata ma ua latou ioe foi i le moliaga o le faaoolima.
O i latou uma ia e aofia ai ni matai ma ni taulelea o lea afioaga o loo molia e mafua i le gaioiga sa tula’i mai i le masina o Setema o le tausaga na te’a nei, lea na saisai ai se matai ona tui ai lea o se amo ae sa’esa’e atu i le nuu e mafua i se finagalo o matai o le nuu.
O le to’a sefulutasi o i latou ua nofo taofia nei i le falepuipui i Tanumalala e faatali ai le aso 6 o le masina fou o Tesema e lau ai so latou faasalaga, ae to’atasi ua tatala i tua i ni aiaiga ona o loo tetee o ia i moliaga o le taumafai e faaoo le oti, ma le moliaga o le faaoo o ni manu’a.
Ma o le aso 25 o le masina nei e toe tulai ai Aitauia Ioasa Lemau 70 ma ona tupu tausaga o le soifua, e sa’ili se aso e su’esu’eina ai moliaga ua ia teena.
O i latou ua nofo taofia o le a su’esu’eina le latou talosaga ua faaulu e le latou loia o le a finau ai e tatala i latou i tua i ni aiaiga e faatali ai le aso e lau ai se faai’uga i moliaga ua latou ioeina.
O le moliaga o le ave faamaosi o se tagata e aunoa ma se maliega o lea tagata poo le kidnapping e matuiā, ma o loo aiaia le faasalaga e sefulu tausaga i le falepuipui pe a faamaonia, o le mafuaaga lea o se atugaluga o le faamasinoga e tatala i latou i tua, ona a iai le tagata e lē oo atu i le aso e lau ai le faasalaga, o le a avea ma mafuaaga e toe tolopo ai.
O le Aso Tofi nei e su’esu’e ai le talosaga e tatala mai i tua le to’a sefulutasi ua taofia nei, ma o se faai’uga e taunuu iai le faamasinoga o le a iloa ai le faaauau ona taofia pea i latou pe o le a tatala mai i tua i ni aiaiga o le a aumai e le faamasinoga.
O i latou ua nonofo taofia nei i le falepuipui i Tanumalala, o Vaele Iosia Reopoamo poo Mikaele Reopoamo 75 tausaga o le soifua, Tauti Tiaka 68 tausaga o le soifua, Toemago Pa’u Lasalo, o se isi tamā ua matua foi ae lē o faailoaina i faamaumauga a leoleo le matua o lona soifua, o Lemana Nouata 55 tausaga o le soifua, Ofisa Sitafao poo Setu Sitafao 27 tausaga le matua, Vaa Alai 27 foi tausaga o le matua, Amiga Lagaaia 30 tausaga, Tomasi Samuelu 24 tausaga, Faavevela Lale poo Tuua Lale 27 tausaga, Lemana Pene poo Lemana Faleupolu Pene 57 tausaga o le soifua ma Salapo Etene Uini 61 tausaga o le soifua.
E pei ona silafia o le tamā na aafia i le gaioiga ua mafua ai ona molia i latou nei e to’a sefululua, o le afioga Sooalo Asiata Alaimanuomalo Vitale Tu’u.
