Ua agai i le motu tele i Salafai le auaunaga a se tasi o sui mai Iapani oloo faatinoina lana auaunaga o se fomai o oloa.
E pei ona iai le asiasiga a Yukuki Motoe i nisi o Aoga Tulagalua i le motu tele i Salafai, o ia o se sui mai le ofisa o le Malo o Iapani i Samoa le Japan International Coperation Agency (J.I.C.A.) lea o loo galue ai i le vaega o Soifua Maloloina i le atunuu.
O lana auaunaga o le mautinoa lea o le soifua maloloina lelei o oloa o le fanau lea na asiasi ai i le Aoga Tulagalua a Saipipi ma Itu o Tane Numera 1.
O le faatinoina o lenei polokalame e aofia ai se folasaga malamalama ina ia faigofie ona iloa e alo ma fanau le tulaga e oo ai pe a lē tausia lelei le soifua maloloina o oloa.
Sa galulue faatasi ai Motoe ma se tasi o alii fomai Dr. Emosi Ah Ching mai le maota gasegase i Tuasivi faapea ai ma nisi o fomai nifo mai Iapani o loo taimua i se tasi o faalapotopotoga tuma’oti ua ta’ua o le Lumanai Samoa.
O vaega uma e faatino ina ia puipuia lelei oloa o le fanau e faigofie lava pe a tausisi ai i aso uma e pei ona tuuina mai i le pepa o faamatalaga a le J.I.C.A.
Ua fautuaina fanau ia tetee atu i le taumafaina tele o meaai suamalie e aafia ai oloa ma ia tausisi pea i le ola maloloina o oloa.
