Ua loa tausaga o faatino pea lenei auaunaga e le faalapotopotoga o le asosi o faafafine ma faatama i Samoa e le gata i fesoasoani seleni ae o fua o faaeleeleaga ma mea taumafa e tuuina atu lea i nisi o faalapotopotoga.

O le mae’a ai o le fonotaga i le asō o loo iai le fuafuaga e tuuina atu nisi o fesoasoani o mea taumafa i faalapotopotoga e aofia ai le Goshen Trust, o le faalapotopotoga o le Toomaga mo ē Puapuagatia faatasi ai ma le nofoaga o loo iai monike i Vailima.

Ta’ua e le Peresitene ia Alex Su’a, “O le amataga o le asosi lenei e lei iai ni kalapu poo ni faalapotopotoga i nuu i tua ae o le taimi lenei ua iai kalapu e 18 i le atunuu lea o loo aumaia oloa o fua o faaeleeleaga ma le tele o vaega e faatino ai a matou fesoasoani.

“O lenei foi la tausaga o le a tuuina atu ai la matou fesoasoani i nisi o faalapotopotoga i le atunuu auā o le mea moni lava ia o le aganuu lava lea a tatou ma o se faatinoga ua masani ai le asosi lenei.

“O le faasinomaga lava ia o le faafafine o le tausiga o lona aiga ma e faamanatu pea i le matou asosi aua ne’i galo lou tiute o le tausiga o lou aiga e eseese lava e faatino ai le tautua ae o nisi nei o auala o loo matou faaaogāina e tuuina atu ai lenei fesoasoani pe itiiti pe tele foi o le agaga lava ina ia faatino la matou tautua ua masani ai.”

O se tasi o auala o fesoasoani a le asosi e aofia ai a latou polokalame ma vaega o loo gafatia e sui taitasi mo lenei faamoemoe.