Ua taunuu le fonotaga a le Kapeneta i le Aso Lulu o lenei vaiaso i le faamaonia o le filifiliga o nisi o faauluuluga o nisi o auaunaga a le Malo, e pei ona filifilia le faletua le afioga Fonoti Talaitupu Li’a Taefu e avea ma Ofisa Sili fou o le Matagaluega o Tiute ma Tupe Maua.

E tofia lea alo tamaitai o le atunuu o loo ia tauaveina le tofiga sui Ofisa Sili o lea auaunaga tāua a le Malo.

Ua sui tulaga o ia i se tasi o tina ma tamaitai o le atunuu sa seei i le tofiga le afioga Matafeo Avalisa Fautualii.

Ua toalua ai nei tamaitai ua tusi aao iai le Malo e faauluulu i le matagaluega o tiute ma tupe maua.

O se tasi o tofiga ua faamaonia e le Kapeneta, o le faauluuluga o le ofisa o le Komisi o Galuega a le Malo le Public Service Commission poo le P.S.C ua filifilia iai le susuga Kolone Tikeri sa galue mo ni tausaga i le Pulega o le Suavai, ae tofia nei o loo galue i le polokalame o le siosiomaga a Malo Aufaatasi.

O le tofiga Ofisa Sili mo le ofisa o le Komisi o galuega a le Malo na soloia ma aveesea i le taimi o le faigamalo sa iai, peitai o le tausaga e 2022 ina ua see atu le faigamalo fou na toe faaofi ai lea tulaga ona o le silasila a le Malo e tāua tele mo le auaunaga a le komisi i matagaluega a le Malo. 

Ua lima ai tofiga o faauluuluga o auaunaga a le Malo ua faamaonia e le Kapeneta talu mai le vaiaso na tea nei, na faamaonia ai ofisa sili fou mo le Matagaluega o Faatoaga ma Faigafaiva, o le faauluuluga o le ofisa Tausi Mavaega ma le faauluuluga o le faalapotopotoga o fale le Housing Corporation.