Ua upuia e se tasi o ta’ita’i o le malo o Fiti, ia Niu Sila ma Ausetalia i le leai o ni o la leo e faatatau i aiātatau a tagata soifua i le Pasefika.
O le fonotaga a ta’ita’i o le Pasefika poo le Pacific Islands Forum faato’ā uma atu i Fiti, e faapea e faai’u i le lē fia talanoa mai o le Palemia o Ausetalia Anthony Albanese ma Jacinda Ardern o Niu Sila i le sau i lalo o faiga faatemokalasi i le Pasefika.
O le leai o ni o laua finagalo faaalia i lenei mataupu ua faaalia ai e le ta’ita’i o le itu agai i Fiti, Biman Prasad lona popole.
O le manatu o Prasad e ala ona gūgū ta’ita’i o Niu Sila ma Ausetalia i le mataupu lenei ona o le fefefe ina ne’i atili unaia atunuu Pasefika e faalagolago ia Saina.
E leai se tali mai a le matagaluega o le va i fafo a Niu Sila faasaga i saunoaga a le sui o le malo o Fiti.
