Saunoa le alii fusu o Deontay Wilder e na te faaaloalogia le alii fusu o Joseph Parker ae ua sauni foi e faatoilalo i le la fusuaga ua faatulaga mo le faaiuga o le tausaga nei.
Sa faia faamatalaga a Wilder ina ua feiloai i le taeao analeila i Lonetona mo le feiloaiga ma tusitala ma ua faamautu ai o le fetauiga i le va o Parker ma Wilder o le a faia i Saudi Arabia i le aso 23 o Tesema.
Na lipotia i le One News se faamatalaga a Parker i le aso e faapea na faia le faaiuga i le amataga o le tausaga ina ia faaauau pea taumafaiga ma o le fusuaga lona fā lea o le tausaga mo ia.
Na ta’ua e Parker, e talu ona amata mai ona fusu na te lei agai ese lava mai se fusuaga poo ni avanoa tetele foi ma ua sauni mo le fusuaga lea ma Wilder.
O fusuaga ia i le aso 23 o Tesema e fetaui ai foi Anthony Joshua ma Otto Wallin ma Parker ma Wilder o fusuaga autu ia o le Day of Reckoning.
