Ua lata ina tuua Samoa e le sui o le Malo o Niu Sila poo le Komesina Maualuga o lea Malo o Dr Trevor Matheson, ae o lona taimi galue Samoa e tele lana fesoasoani i le aumaia o fesoasoani a lona Malo mo le atinae o tagata tafafao maimoa mai fafo.

O se tasi o ia fesoasoani na faatupe ai e Niu Sila nisi o atinae tau tagata tafafao, e pei o laupapa faailoilo e iloa ai nuu ma afioaga o le atunuu.

O le Aso Lua o lenei vaiaso na tuuina aloaia atu ai e le Komesina Maualuga o Niu Sila i Samoa, laupapa ua mae’a ona vali ma tuu iai ma pou uamea e faatutū i nuu ma afioaga ua iai ma igoa o ia nuu.

O se taumafaiga tāua lenei a le pulega o tagata tafafao na faatupe e Niu Sila auā, e tāua mo tulisi tafafao le agai mo tafaoga ma matamata solo i le atunuu ae o loo iai laupapa ua pipii ai ma igoa o nuu ma afioaga.

O le fautuaga a le pulega o tagata tafafao i alii ma faipule o afioaga faapea le lautele o le atunuu, e tāua le galulue faatasi e vaavaai le puipuia o ia meatotino aogā ma tāua.

O le taitaifono o le Komiti Faatonu o le Pulega o Tagata Tafafao mai i Samoa le afioga Tauiliili Alise Stunnenberg ma le Komesina Maualuga o Niu Sila na o la faailoa aloaia le mae’a o le fausia o faailoilo.

I le avea ai o lea mafutaga faaiu ma le susuga Dr Trevor Matheson na faameaalofa ai e le Pulega o tagata tafafao se tanoa palu’ava, o le fue ma le tootoo mo le alii Komesina Maualuga o le a toe taliu i Niu Sila.