O le Aso Tofi lenei ua faamoemoe o le toe aso o suesuega a le faamasinoga i le talosaga poo le tagi a le sui tauva susuga Fuiono Tenina Crichton o loo ia lu’i ai le agavaa o le sui tauva ia a Tuitogamanaia Dr. Peniamina Sopoaga Leavai.
Na faaulu le mataupu o tuuaiga o le lē agavaa o lea sui faatū i aiaiga o le monotaga faalenuu faapea le monotaga faalelotu peitai o lea ua malilie itu e lua e faataatia ese le finauga i le monotaga faaleaganuu ae finau i le monotaga faalelotu. Ua faaalia e le Loia o le itu tagi i se talanoaga ma le maea o suesuega i le Aso muamua o le a taualuga le finauga lenei i molimau e lua o loo faapea ona totoe o le mau tuufofoga mai se faafeagaiga ma le molimau a lē o loo faasaga iai le lu’i o le lē agavaa lea i le monotaga faalelotu.
E pei ona silafia o le vaiaso fou o le a faataunuu ai le faamoemoe e ala i palota laiti mo itumalo faapalota e 7. Mo le itumalo o Falealupo e na’o le to’alua sui tauva o le a finauina le tofi faipule o lea itumalo ma o Fuiono Tenina Crichton o le FAST ma Tuitogamanaia Peniamina Junior Leavai o le HRPP.
O se taimi o i luma ona faailoa mai lea le iuga o lea mataupu lea o loo i luma i le faamasinoga.
