Ua filifilia le togātogo i Nono’a Saleimoa e avea ma nofoaga faasao ma puipuia lelei, ina ia avea ai Samoa o se tasi o atunuu o Malo o le Taupulega e aofia i se polokalame o loo autū i galuega tau i le puipuia o le siosiomaga faalenatura o gataifale.

Ua faailoa e le Matagaluega o Puna’oa Faalenatura ma Siosiomaga o se tasi lea o molimana’o o le Tupu o Salesa III ia avea lona malaga mai i Samoa ma lana Masiofo ma avanoa na te amataina ai se poloketi e autū i le faasao ma le puipuia o le siosiomaga o gataifale e pei ona aofia ni atunuu se 15 o Malo o le Taupulega i se poloketi faapea, na amatamea ai atunuu mo le puipuia o le siosiomaga o le lalolagi le Cop26.

O le kalapu o le Roteri i Samoa ma le Roteri i le lalolagi o loo galulue faatasi nei i le taumafaiga o le faasao o le togātogo i Nono’a Saleimoa lea sa feiloa’i ai sui o lea afioaga ma sui o le kalapu o le Roteri ma le matagaluega o puna’oa faalenatura ma siosiomaga i le faai’uga o le masina na te’a atu nei o Setema.

O nisi o galuega o le a faatino a o lumana’i le Fono a Malo o le Taupulega i le vaiaso mulimuli o lenei masina o Oketopa, o faalauiloa ina ia silafia e le atunuu le tāua o le faasao o togātogo e avea ma nofoaga malu mo meaola o le gataifale, a o loma le faalauiloaina aloa’ia o lenei poloketi i le taimi o le Fono a Malo o le Taupulega.