Ua faalauiloa e le ta’ita’i o le malo aso mālōlō, e tauia ai le gapatia  o tagata faigaluega a le malo i le fonotaga a ta’ita’i o malo o le taupulega.

I le sauniga o le lotu faafetai i le vaiaso lenei, na faalauiloa ai e le ta’ita’i o le malo le tamaitai palemia o le aso 1 ma le aso 4 o le masina lenei o le a avea ma aso mālōlō mo nao tagata faigaluega a le malo.

“Ua a’e ai se tofa i le Kapeneta e tauala mai i le fautuaga a le Komisi o Galuega a le Malo o le a faatino le mālōlōga umi mo le faai’uga o le vaiaso (long weekend) mo le aufaigaluega uma a le Malo.

“E afua atu i le Aso Faraile nei, aso 1 Novema, seia oo atu i le Aso Gafua, 4 Novema tatou te mālōlō ai, ona toe a’e lea o a tatou galuega i le Aso Lua, 5 Novema 2024.

“Ae mo Faalapotopotoga a le Malo, ma galuega mo le soifua laulelei o le atunuu (essential services) o le a taoto atu pea i Komiti Faatonu ma Faauluuluga, latou fetuuna’ia a latou galuega mo aso ua taua, ina ia faaauau pea ona maua e le atunuu auaunaga mo le soifua laulelei.”

E le’i aofia i le saunoaga a le ta’ita’i o le malo pisinisi tuma’oti, ma na tele ni faamatalaga na agiga i luga o upega tafa’ilagi i nisi o tagata faigaluega mo pisinisi tuma’oti ua fesiligia ai pe aisea ua lē aofia ai ma latou i aso mālōlō ua faalauiloa e le tamaitai Palemia.