Ua lē fiafia le Komesina o Sulufaiga i aoga e lua i Niu Sila ua lē taliaina ana fautuaga na fai iai, e o e faatoese i mātua o tamaiti aoga.
O Setema o le tausaga talu ai na tuli ai e le kolisi a St Peter’s i Aukilani se tasi o tamaitiiti aoga ona o le tagofia o le mariuana ma na faia ai le faai’uga a le komiti faafoe e tuli.
O se faai’uga na sulu ai mātua i le Komesina o Sulufaiga ma faaseā ma i le mae’a iloilo ai e le pulega ma faatusatusa i isi mataupu faapea, na iloa ai ua mamafa tele le faai’uga o le faate’a ma e lei mulimulita’ia foi ta’iala.
O le isi aoga maualuga o Cashmere High School lea e lei taliaina ona e faapea e lē nofo i totonu o le sone a le aoga e ui o lea e aoga ai le isi ona tei.
I iloiloga a le Komesina o Sulufaiga na maua ai e lē o le lē taliaina o le talosaga ae o le auala na talanoa ai ma mātua lea e leai ma se faamalamalama.
Fai mai ai Komesina o Sulufaiga i kolisi nei e tatau ona faatoese i mātua, peitai o le tali e leai.
I se lipoti a le leitio a Niu Sila, afai ae teena pea e kolisi nei le tatau ona faatoese o lona uiga e ono oo lenei mataupu i le Palemia ma le Palemene.
Puna o Faamatalaga: Chief ombudsman disappointed with schools failure to act on recommendations | RNZ News
