Ua aafia femalagaa’iga a vaalele i Aukilani, leai se eletise, tapunia auala ma e iai aiga ua poloaia le oese ma fale ona ua lē saogalemu.
O aafiaga nei o le tele o vaega o le atunuu a o iai e lē gata o le malolosi o savili ae o timuga mamafa.
O lea ua faalēaogāina lapataiga o timuga mamafa mo Westland ae ua lanu mūmū ai lapataiga mo Coromandel, Bay of Plenty, Mount Taranki ma le ogatotonu o Marlborough.
O Marlborough foi lea ua faatonuina nisi o aiga e oese ona o le ono lamatia i lologa, ma e tusa ma le 70 aiga i Spring Creek lea ua ave iai le faatonuga, ma e tatau ona oese a o lei taina le 9 i le taeao nei.
I lipoti i le taeao nei o lea o loo agai le Civil Defence i fale taitasi ma faailoa iai e oese ma e lē tatau ona toe vave foi ane seia ta le 5 i le afiafi nanei.
E tuufaatasia tala fou e lē o iai ni fale e o iai tagata ua aveesea mai o latou lava fale i Marlborough.
I le taliu mai i feoaiga a vaalele, e ‘afa ane le fitu anapo ua 46 faigamalaga a le Ea Niu Sila i totonu lava ia o le atunuu na faalēaogāina ananafi ona o le malolosi o savili, ma o le fautuaga ua tuuina mai i pasese o loo faatapena mo faigamalaga i le asō ma faasolo atu i le faaiuga o le vaiaso, e tulimataia suiga o faigamalaga ma taimi i luga o le app a le kamupani ona o aafiaga o le tau.
Ua sau i le taimi pisi o femalagaa’iga a le toatele a o amata ai tuuaga o aoga a le fanau.
I feoaiga a taavale i luga o le laueleele, o lea ua tapunia le tele o auala i West Coast e aofia ai ma le SH16 i le va o Ross ma Haast ona o laau toulu ma palapala solo.
Na ta’ua mai foi anapo le tele o pitonuu i Aukilani na motusia eletise.
Puna o Faamatalaga: Weather updates: Rain lashes North and South Islands | RNZ News
