$6 miliona le fesoasoani a le malo ua faailoa mai mo tagata Maori ma le Pasefika o loo aooga I le faatosaga

Ao utiuti ai le fuainumera o faatosaga I totonu o Niu Sila, o komiuniti Maori ma le Pasefika lea o loo pagatia tele I le utiuti o ona tagata e iai le tomai I nei auaunaga

I le faaaliga mai le minisita lagolago o le soifua maloloina ananafi, Dr Ayesha Verrall o lea $6 miliona o le a faasoa I totonu o le 4 tausaga e fesoasoani ai I aoga faapea le faafaigaluegaina o tagata Maori ma Pasefika I nei galuega

Saunoa le minisita lagolago o loo moomia le faaluaina o le fuainumera o tagata Maori ma Pasefika e mafai ona galulue o ni faatosaga

I le taimi nei e na o le 10% faatosaga Maori ae na o le 2% tagata Pasefika I totonu o le tuufaatasiga o tagata faatosaga I Niu Sila

I ripoti a le Newshub, o loo faaalia ai le talia ma le fiafia e le pule sili o le kolisi o faatosaga I Niu Sila, Alison Eddy o lenei fesoasoani tele