Ua iai nei le faai’uga a le malo e ala i le Kapeneta e faatau mai ai ni afi eletise fou se lua i se tau e tusa ma le lima miliona tala, i le faamoemoe e faaleleia ai le maua o le uila poo le eletise, i le tuana’i o le Aso Sa ma le po o le Aso Lua o le vaiaso nei na motusia uma ai lea auaunaga i le motu o Upolu.
Ua faailoa e le afioga i le Minisita o Galuega tetele ma fela’ua’iga e aofia ai le faalapotopotoga o le malosi tau eletise lea faai’uga a le malo, a o galulue ai le aufaigaluega a le faalapotopotoga e faaleleia le faaletonu ua aafia ai sooga o uaea malolosi o loo faataoto i lalo o le palapala lea o loo fesoota’i ai le nofoaga o iai le afi i Fiaga ma le afi i Fuluasou.
Faaalia e le minisita le tofa Olo Afoa Fiti Vaai o le mafua’aga lea o le pē faafuase’i o le eletise i le Aso Sa ma le po o le Aso Lua i le motu atoa o Upolu.
O le fuafuaga e pei ona faailoa e le minisita i le ta’i lea i luga o pou moli o uaea malolosi o loo faataoto i lalo o le palapala i le va o le afi i Fuluasou ma le afi i Fiaga, o se galuega ua faailoa e le pulega o le malosi tau eletise i se faasilasilaga faalaua’itele, o le a amata i le Aso Faraile o le vaiaso nei.
E 2 kilomita le umi o le laina malosi i le palapala o le a suia i le laina malosi e 1 tesimale 7 kilomita o le a ta’i luga ma o le a faatino lea laina i se vaega latalata i le malae tapolo i Faleata.
Ua faamālūlū ai le Minisita ma le pulega o le malosi tau eletise ia i latou uma na aafia i le tulaga sa motusia ai le auaunaga, ma le naunauta’iga o le a lava papale ma lagolago atu le atunuu a o faatino galuega uma mo le toe faaleleia o le faaooina atu o le eletise i laoa ma maota faapea pisinisi uma.
