O le 34 pasene o tina ma tamaitai o le atunuu na aafia i āuga o le gasegase o le kanesa i le tausaga na te’a nei 2023, e to’atele lava o tamaitai ma tina na maua i le kanesa o le susu, poo le breast cancer.
O le lu’i lea ua feagai nei ma le sosaiete o le kanesa i Samoa o le faamalosia atili o a latou tala’iga ma polokalame faalauiloa i le atunuu e faatatau i le gasegase, i le faamoemoe autū ia vave ona silafia e tagata uma faamatalaga i āuga o le kanesa ma vave faailoa i le sosaiete mo le tuuina atu i le auaunaga a foma’i mo le faia loa o ni togafitiga a o lei oo ina tugā ma ogaoga ni āuga e aafia ai.
O le masina lenei o Oketopa ua avea ma masina e faatino ai polokalame faalauiloa a le sosaiete o le kanesa, ae lagolago malosi e le Malo e ala i le matagaluega o le soifua mālōlōina e pei ona faaigoa lea polokalame faalauiloa o le Oketopa Piniki poo le Pinktober.
O taumafaiga nei e laei ai le lanu piniki e le tagata aemaise o nisi o tausaga sa vali piniki atoa ai le uati tele i le taulaga.
Na faaalia e le Peresitene o le sosaiete o le kanesa le faafetai i le faiga faavae muamua ua taulamua ai le malo, ma o se faailoga lea o le lagolago i taumafaiga e faailoa i le atunuu lea gasegase faigata e mafai ona togafiti ma manuia se tagata, pe a vave iloa ona āuga.
O se finagalo o le Peresitene o le sosaiete o le kanesa le afioga Tauiliili Alise Faulalo Stunnenberg.
O le faletupe o le ANZ i Samoa o se paaga totino a le sosaiete o le kanesa sa faia ai le sauniga e amata aloa’ia ai polokalame faalauiloa o le Oketopa Piniki poo le Pinktober o lenei tausaga, ma sa foa’i ai e le pulega o le faletupe se seleni e 10 afe tala mo galuega a le sosaiete o le kanesa.
Sa saunoa ai foi le Minisita o le Soifua Mālōlōina.
Le Minisita o le Matagaluega o le Soifua Mālōlōina, afioga Valasi Luapitofanua Toogamaga Tafito Selesele.
