O le fonotaga a le Kapeneta i le vaiaso talu ai na toe faai’ugafonoina ai le toe tofia o le afioga ia Motoalii Mulipola Roger Hazelman, i lona tofiga o le Ofisa Sili o Pulega mo le Faalapotopotoga Faavae Tau Fatuga’o i Samoa (Samoa National Kidney Foundation – S.N.K.F.).
O le tausaga e 2008 na muai tofia ai Motoalii i lea tofiga seia oo mai lava i le taimi nei, ma o lea ua atoa le 16 tausaga o ia tauaveina pea lenei tofiga o le Ofisa Sili o Pulega mo le S.N.K.F. ma o se tofiga e taitolu tausaga le umi.
O se tamalii ua lava lona silafia i le faatinoga o lenei galuega ma o loo ia umia foi faailoga taualoa o le Bachelor of Arts in Management faatasi ma lona BA faapitoa i le itu tau Tamaoaiga ma Pulega.
O loo iai i faamaumauga a le faalapotopotoga, i le tausaga e 2001 ina ua muai faavae lenei auaunaga mo Samoa e avatu ai se fesoasoani ia i latou ua aafia fatuga’o, e na o le to’a 10 gasegase na amata mai ai, ae i le taimi nei o lea ua silia ma le 190 tagata Samoa ua aafia i lenei gasegase o le afaina o fatuga’o.
O le tausaga e 2005 na uluai faatūina allais ai loa le Falema’i mo le Faalapotopotoga Faavae Tau Fatuga’o poo le Fale Faamamā Toto, ae o lona ofisa autu o loo iai i Motootua i le Maota Gasegase o Tupua Tamasese Mea’ole.
Mo Salafai, o loo iai lona lālā i le Falema’i o Malietoa Tanumāfili II i Tuasivi auā lava le ofoina atu o le auaunaga faamamā toto mo i latou ua aafia i lea gasegase.
O le afioga ia Motoalii o loo ia tauaveina lea matātā tāua i lalo o le ta’ita’iga a le Minisita, le Afioga Valasi Luapitoifanua Toogamaga Tafito Selesele.
