E toalua tagata ua faia iai ni moliaga i le mataupu ua faailoa mai ai le ave faamalosia o se taavale i le ogatotonu o Kuiniselani ae o loo iai totonu se pepe teine.
O le leoleo suesue o Luke Peachey sa ia faamatala o le tina o le pepe na alu e piki lana faatau i le click and collect service i le taulaga faatau i Yeppoon, ae oso ane le isi tamaitai i totonu o le taavale a le tina lea ma agai ese mai ai ae o loo iai le pepe i tua o le taavale.
Ua molia nei la e leoleo se tamaitai 24 tausaga mai Cobraball i le faaaogā faasolitulafono o le taavale ma le ave faamalosia o se tamaititi ma le avetaavale e leai se laisene.
O le isi alii e 36 tausaga ua molia foi, fai mai leoleo ua matuai mafatia le tina o le teineititi, e ui e lei afaina le teineititi peitai o nai tagata na taumafai ane e fesoasoani i le tina ua ta’ua sa aafia i le taavale ma iai manuaga i o latou vae.
E 16 tausaga o le tama talavou na ia siieseina le pepe mai le taavale faatasi ma nai isi tagata na avatu i le falemai e togafita ai ona o manuaga.
O loo faia le suesuega ae fai mai leoleo o le itu e faafetai ai ua toe saogalemu le teineititi.
