O le aso 23 ma le 24 o le masina lenei o Novema o le tausaga nei 2024, ua faamauina i talafaasolopito o le atina’e o tagata tafafao mai i Samoa, ona o aso ia na afea ai le uafu tele i Apia e se meli tele la’upasese ma taula ai i le po atoa, ae aga’i pasese e nonofo i faletalimalo ma fale apitaga tau lalata mai i le taulaga.
O se taimi muamua lea ua taula ai i le po atoa se meli i le uafu autū o le atunuu ae tafafao pasese i fale kalapu ma faletalimalo faapea ona latou afea ai ma fale’aiga mo taumafataga.
Ua faaalia e le pulega o tagata tafafao mai i Samoa, o le kamupani o le Betham Brothers Enterprise na auala mai ai lea meli la’upasese ma o se taumafaiga a lea kamupani ua faatino ina ua mae’a ona auai i se faatasiga tele o le atina’e o tulisi i meli la’upasese sa faia i Amerika.
O le tausaga nei ua faamauina ai foi le aofa’iga o meli e 26 ua afea Samoa, ma o le 24 ua mae’a ona malaga mai pasese ae toe lua meli tetele o le a afea le atunuu i le masina fou o Tesema.
O se tasi lea o tautua i le atina’e o tagata tafafao o loo tele seleni o loo maua mai ai, o meli la’upasese.
