O le aso a taeao e atoa iai le 59 tausaga talu ona saoloto mai Samoa i faiga faakolone lea na pulea ai e nisi o atunuu mai fafo e pei o Siamani ma Niu Sila.
O le tausaga e 1962 na uluai sisi ai le fu’a o le saolotoga o le Malo tutoatasi o Samoa. Peitai o le tausaga nei o le a faaauau ai le faasalalauina o polokalame o le tutoatasi i luga o ala ata o televise, ala leo ma upega tafailagi e pei na iai le tausaga na te’a nei.
O le polokalame e aofia ai le faasalalauina i luga o le televise ma ala leo uma i Samoa le malelega a le Ao o le Malo ae le gata i lea o le sisiina a’e o le tagavai o Samoa i Tiafau i Mulinuu e le Sui o le Fono a Sui Tofia ia Le Mamea Ropati Mualia.
Taua e le taitaifono o le Komiti o Faalavelave faafuasei N.E.O.C Agafili Shem Leo “ e uma sauniga mamalu i le taeao ona see atu lea i ala leo o televise ma upega tafailagi faapea le leitio e faasalalau ai faafiafiaga mai tausaga ua mavae ma faaiu ai lea i le sauniga mulimuli o le tuuina i lalo o le tagāvai o Samoa.”
Taua foi e Agafili ua afua lenei tulaga ona o puipuiga lava mai le faamai o le Koviti19 auā le saogalemu pea o Samoa ma faamamalu ai poloaiga o faalavelave tutupu Faafuasei (SOE).
E ui lava ua atofa le aso a taeao e malolo uma ai le atunuu e le’i tuuina mai se faasilasilaga faalauaitele a le Ofisa o le Komiti o Faalavelave Faafuasei N.E.O.C e taofia ai le tumutumu o le Malae i Tiafau ona o le savali filemu i le asō.
