Ua alu faalauiloa a le matagaluega o le soifua mālōlōina i le faamoemoe e una’ia tuipuipui o le HPV mo alo ma tamaitai laiti i le vasega tausaga ono ma fanau teine i le 10 ma le 17 tausaga le matutua, ina ia puipui mai ai i le gasegase o le kanesa o le gutu o le to’alafanau le cervical cancer.
Ua faailoa i auala o fesoota’iga televavave le una’ia o tuipuipui mo lea ituaiga o kanesa e maua ai tamaitai, a o sauni fanau i le toe a’e o a’oga o lenei tausaga i le amataga o le masina fou o Fepuari.
E fetaui lelei ai le toe foi o fanau i a’oga ma le oo atu iai o le galuega a le soifua mālōlōina mo le faia o tuipuipui o tamaitai.
O le kanesa o le gutu o le to’alafanau o se tasi o ituaiga o kanesa e fitu o loo aafia ai tamaitai i Samoa ae o loo numela muamua lea ituaiga o kanesa i le fano o soifua o tamaitai i atunuu o le Pasefika.
O le tausaga e 2023 na faalauiloa ai le ta’iala mo le togafitia ma le tetee atu i lea kanesa i totonu o Samoa.
