Fai mai le taitai o le Destiny Church, Brian Tamaki ua faia le faaiuga a leoleo e le moliaina o ia ile solia o aiaiga o lona tatala I tua ina ua agai ise solo tetee na faia I le Auckland Domain ae fai mai leoleo pei ona taua I le Newstalk, e leai se faaiuga ua faia ma o loo faagasolo pea suesuega.
I videos o loo tuuina e lona faletua Hannah Tamaki I le facebook ua faailoa ai e Tamaki sa tuu e molia o ia I le solia o aiaiga o le toe tatala ai o ia I tua ina ua ia auai faasolitulafono I se tasi solo tetee na faia I le amataga o le masina.
O loo teena e Tamaki ona moliaga mai le amataga ma o lalo foi o aiaiga o le toe tatala ai I tua, e faasa ai ona ia toe tuufaatasia pe auai foi I se solo tetee e solia ai aiaiga o le koviti 19 ma tulaga tau le puipuiga, peitai ina ua taunuu atu I le ofisa o leoleo I Auckland Central na faailoa ane iai e toe foi ile fale ma o le a le toe faaauauina le mataupu.
Fai mai Tamaki o loo galulue pea ana loia I faamaoniga mai le aso toonai lea e taua e oo atu I le 2 afe tagata na auai ane I le Auckland Domain e tetee I le vavao o loo feagai ai ma Aukilani.
