O lenei fonotaga o loo faafoeina lea i le Malo o Toga ma o loo auai ai Minisita o le Soifua Maloloina mai atunuu i le Pasefika.

O loo usufono ai le Minisita o le Matagaluega o le Soifua Maloloina, le Afioga Valasi Luapitofanua Tafito Selesele.

O vaega o loo laualuga ai talanoaga o lenei fonotaga e aofia ai le toe faufau o nisi o vaega o le auaunaga faalesoifua maloloina i le Pasefika, o le taumafai e tetee atu i nisi o faama’i e pei o le tino puta i fanau laiti ma le tupulaga talavou, faaleleia tulaga i faamaumauga tau soifua maloloina ma le faaleleia ma faamalosia vaega o auaunaga faasoifua maloloina mo le manuia lautele o tagata.

I faamatalaga mai le Pacific Community o le fonotaga lenei a Minisita sa amata usuia lea i le tausaga 1995 e tali atu ai i nisi o mataupu ogaoga o loo aafia ai le soifua maloloina o atunuu o le Pasefika.

O se tasi vaega o lenei fonotaga o le faavaeina lea o se tasi o vaaiga mamao ua ta’ua o le soifua maloloina o atumotu o le Pasefika o loo taiala ai faalauiloa o le ola puipuia ma le saogalemu o le Pasefika mai faama’i o loo aafia ai.

O nei foi fonotaga o loo fausia ai se faavae ma se avanoa e silasila ai sui usufono i vaega ua ausia mai lea tausaga i lea tausaga ma faasoa ai tomai ma agavaa e ona faaleleia ai le auauanaga a le soifua maloloina i le Pasefika.

O nei taumafaiga ina ia ogatasi lea ma fuafuaga o atina’e faaauau e pei ona folasia i iugafono a Malo Aufaatasi faatasi ai ma taiala oloo tuuina mai e le faalapotopotoga a le soifua maloloina i le lalolagi e lima taitaiina ai vaega o auaunaga i soo se atunuu.