Ua toe valu vaiaso ona faataunuuina lea o le taaloga faavaomalo i le va o le Toa Samoa ma le ‘au malosi a le Kiwi i le malae o Eden Park i le aso 21 o Oketopa. 

O le tausaga lenei ua toe lalaga mai ai le taamilosaga lenei i le va o atunuu e fā e aofia ai Niu Sila, Ausetalia, Samoa ma Tonga, peitai ina ua mae’a le Ipu o le Lalolagi a le lakapi liki na se’i mavae atu nei, na faatuai ai ona faailoa ma faalauiloa le toe faaauauina o lenei taamilosaga i atunuu e fā, ua mafua ai loa ona le auai Tonga i lenei taamilosaga ae agai loa i Egelani e faaauau ai le latou tua i le taimi lava lea e tasi. 

O le taamilosaga lenei e lē o se mea fou, o le taamilosaga ua leva ona iai ae sa alu alu nofo ona o taimi sa aafia ai le lalolagi i le koviti, peitai o lea ua toe lalaga ina ia mafai ona maua pea avanoa e faaauau ai le taamilosaga lenei ua faaigoaina o le Pacific Championship Cup. 

Na ta’ua e le tofa ia Teleiai Edwin Puni o le sui o Samoa o loo fai ma sootaga i totonu o le New Zealand Rugby Legue, o latou ia o loo gafa ma le faafoeina o lenei taaloga i totonu o Niu Sila i le aso 21 o Oketopa, ua mae’a ona faalauiloa aloaia lenei taaloga i le masina o Oketopa. 

Ma o le faanaunauta’iga e tatau ona oo atu i le aso 21 o Oketopa i totonu o le Eden Park ua lanu moana faasoloatoa itu e fā o le malae i le tapuaiga a Samoa. 

I le taimi o le Ipu a le Lalolagi sa maitauina ai le malosi o le lagolago a Samoa mo ana tamafanau e faailoa lea i solo taavale ma fu’a sa faalealea i luga o magāala. 

Peitai e iai le talitonuga o Teleiai, ua leva ona fia feiloai le tapuaiga a Samoa i ana tamafanau o loo taaalo i lea foi taamilosaga o le lakapi liki i totonu o Aotearoa ma o se avanoa lelei lea e mafuta ai le atunuu i ana tamafanau. 

Ua amata ona salalau le faatauina o tickets o le taaloga a le Kiwi ma le Toa o Samoa i luga o upega tafailagi ma ua faasolosolo atu ina toatele le atunuu ua latou saili iai ona o le naunau lava ia manaia se tapuaiga mo le Toa Samoa. 

I le lalata o le vai vaa o tapenaga a le Toa Samoa ma le Kiwi ia Oketopa, ua faailoa ai I se faatalatalanoaga ma le pulega a le lakapi liki a Samoa, o loo faatinoina pea galuega a le pulega a le lakapi liki a Samoa i le iloiloina lea o se faiaoga mo le ‘au a le Toa o Samoa. 

Na ta’ua i lea faatalatalanoaga e toatolu nisi ua mafai ona faaoo atu suafa i lea avanoa poo le faiaogaulu mo le Toa Samoa, ae le o mafai ona faailoaina i le taimi nei. 

Atonu ua vave mai se taimi ona manino lea o le mata o le vai I se faiaoga e see atu e filifili lana ‘au mo lea taamilosaga o loo loma nei ia Oketopa.  

O loo galulue faatasi le lakapi liki a Samoa ma nisi o tamalii o loo i Aotearoa auā le faalauiloaina o le taaloga a le Toa o Samoa ia Oketopa.