Ua toe nei o se aga ona faataunuuina loa lea o le faamoemoe a itumalo faapalota e 7 e ala i a latou palota laiti e saili ai ni a latou faipule mo le Palemene o Samoa.

Ua toe 14 nei aso o loo totoe ona maua lea o se iuga pe ono iai se suiga i le aofai o sui mo vaega faaupufai o loo tauva nei pe e tumau pea le tulai mai o le FAST o le vaega faaupufai o loo toatele ona sui a faipule.

O le vaiaso na sei mavae atu nei na resitala ai sui tauva i faigapalota laiti mo itumalo faapalota e 7 ma o le vaiaso nei o le avanoa mulimuli lea e tuu ai i sui tauva e toe faaui ai i tua o latou suafa ae lei aloaia loa le lisi faaiu mo le faamoemoe i le masina nei.

E pei ona silafia o itumalo faapalota e 7 e aofia ai Sagaga No.4, Falealupo, Safata No.2 o itumalo ia na toe faamavae sui na manumalo ae autasi uma ma le sui na tagi e toe foi e fai faigapalota laititi, ae o itumalo e aofia ai Sagaga No.2, Aana Alofi No.2, Aleipata Itupa i Lalo ma Falealili No.2 na faamaonia e le faamasinoga tuuaiga o faiga faatosina o le palota i le masina o Aperila ma lē mafai ai ona toe tauva nisi i le faigapalota laiti mo ia itumalo.

Mai i le lisi o loo iai nei o le tele o itumalo e oo atu i le toatolu pe na’o le toalua foi sui tauva o le a tamomoe mo le palota laititi ae mo le itumalo Sagaga No.2 e to’a 6 sui ua siilima e tauva i le palota laititi mo lea itumalo.

O le Aso 26 o Novema le faiga filifiliga e ala i palota laiti mo itumalo faapalota nei e 7.