Sa tulai se tamaitai i le faamasinoga faaitumalo i Manukau i le taeao analeila, e tali i moliaga o le fasioti tagata i tamaiti e toalua e pei ona lipotia atu muamua na maua tino maliliu i totonu o atopau. 

E lei iai sana tali i ona moliaga ma ua toe faatonuina e tulai i le Faamasinoga Maualuga i Aukilani i le aso 14 o le masina fou o Tesema. 

Ua faailoa mai foi i lipoti aupito lata mai o le mataupu lea ua mafai ona faailoa o lea tamaitai o le tina o tamaiti ua maliliu. O loo faaauau pea ona faasā le faailoaina o le igoa ae e lei atoa se 24 itula talu ona taunuu mai i Niu Sila.

O le masina o Setema tausaga nei na pueina ai lea tamaitai e leoleo i Korea i Saute ma faamatuu mai ai i leoleo Niu Sila i le vaiaso nei lava mo le faia o le faamasinoga.