I le tolu masina o e lei toe auai faipule o Lepa ma Faleata 3 i taualumaga a le Palemene ina ua faamalolo le tumau o la tiute faafaipule seia iai se aso, ona o le togisala na fautuaina e le komiti faapitoa o amioga ma tulaga mamalu na talia e le Palemene.
O le toe faauauina o fonotaga a le fono aoao faitulafono i le Aso Lua o lenei vaiaso o le a toe ulufale ai i le Palemene le taitai o le Itu agai ma se tasi o faipule o lana vaega faaupufai e puipuia aiātatau a tagata, ina ua faamuta mai e le faamasinoga le faasalaga ina ua aafia aiātatau o ia sui faipule le susuga Tuilaepa L Sailele Malielegaoi ma le tofa Lealailepule Rimoni Aiafi.
O le faaiuga foi lea e mafua i se talosaga a ia sui faipule na ave i le tulafono na lui ai le faaiuga a le Palemene, ua faapea mai ai e mafai ona toe asiasi le komiti i le latou faaiuga ma faatino tulaga e lei mafai ona faatinoina o le tapa lea o ni finagalo o sui faipule na faia iai le faaiuga, e faatatau i le togisala ua faia ia i laua.
O lea na toe fono le komiti o amioga ma tulaga mamalu a le Palemene e faatino ai lea vaega o le finagalo o le faamasinoga, ma o le fonotaga i le vaiaso nei o le a folasia ai lea finagalo o le komiti filifilia a le Palemene.
