Na faamanino mai e le Failautusi o le Kapeneta o ia foi o le Ofisa Sili o le Pulega o Matagaluega o le Palemia ma le Kapeneta Agafili Shem Leo le toe filifilia ai o Papalii Monalisa Tia’i Keti ma Sui Komesina o leoleo mo le isi 3 tausaga.
I se pepa o faamatalaga mai le ofisa so’oupu o le malo na faamaonia mai ai e le Failutusi lea tulaga, ae le gata i lea na faamanino mai ai foi le faaopoopo ai o le isi 6 masina e faaauau ai le afioga ia Fuiavailiili Egon Keil i le tofiga Komesina o Leoleo.
Peitai i ripoti mai le Samoa Observer i le aso ananafi na taua ai “o le Aso Tofi o le vaiaso na tea nei Aso 3 o Iuni na tali mai ai le Ofisa Sili o le Matagaluega o le Palemia ma le Kapeneta faatasi ai ma le So’oupu a le Malo e faapea, o le faaiuga a le Kapeneta i le masina o Me ina ia toe faaauau ai le auaunaga a sui sinia e to’alua o le Matagaluega o leoleo ma Fale puipui ua faaleaogaina “
Sa toe fesiligia lea e tusitala le mafuaaga o lea tulaga ae peitai e le’i maua mai se tali.
Mulimuli ane i le Aso Gafua na faasalalau mai ai e le Sooupu a le Malo faasaoga o nei ripoti ma tuuaia ai le Samoa Observer i le sese o latou ripoti. Taua e lea niusipepa o se pepa o faamatalaga mai le Malo ua iloa ai le toe suia o le faaiuga a le Kapeneta i totonu o le 24 itula i le maea ai ona tuu atu o le tali ese i le Samoa Observer.
E ui i le tele o le lē mautonu e ala i lea faaiuga ae ua manino lava le toe tulai mai o Papalii Monalisa i le tofi mo le isi 3 tausaga .
Ae e tusa ai ma aiaiga o le tulafono a le Komisi o le Malo o le tofiga o le faauluuluga o le Matagaluega o Leoleo, Falepuipui ma le Ola Toefuataina e faatoa faasalalau le avanoa i le taimi e faaulufale ai se malo fou o Samoa. Taua e Fuiavailiili lona agaga fiafia ua mafai ai ona toe filifilia le afioga ia Papalii Monalisa e avea ma Sui komesina ma ia faapea ai “o se faaiuga talafeagai tele”.
O lea faaiuga i le faaopoopo ai o le 6 masina o le auaunaga a Fuiavailili ma le toe filiiflia ai o Papalii Monalisa e avea ma Sui Komesina na faia i se fonotaga faapitoa a le kapeneta o le Malo Tausi i le Aso 4 o Iuni 2021.
