Ua toe tatala pe ua toe faagasolo nei suesuega a leoleo i moliaga o loo tuua’ia ai se tamaitai sa galue o se tasi o faatonu mo le auaunaga o falemaliu a le Tipene Funerals, i lona faatinoina o ni faiga lē taualoa ma lē faaaloalo i le teuina o tino maliliu o nisi o tamaalii o Samoa sa tuu atu le faatuatuaga i lenei auaunaga mo le teuina o latou tino maliliu i se Loa poo se nofoaga faapitoa i le fanuatanu o le malo i Waikumete.
O nei faiga e pei ona ta’ua i le lipoti a le Herald, nai lo le tuuina o nei tino maliliu i ni pusaoti faapitoa anagata na totogi ai e aiga le ta’i $3,000 ina ia teuina ai a o lei tuu i totonu o le loa, ae ua na ona afifi lava i ni tagapepa uli e pei o le faiga o ni lapisi (tulou) e teu ai.
I lipoti a le NZ Herald i le vaiaso talu ai sa ta’ua ai ua toe faaui i tua suesuega a leoleo i moliaga na faia faasaga i lē o tuua’ia, Fiona Bakulich ona e lei lava ni faamaoniga o nei moliaga, peitai mulimuli ane i le Aso Faraile lava na te’a nei, na toe sau ai le isi lipoti a le Herald, ua faaaogā e le Tipene Funerals se tagata suesue faapitoa e tilofa’ia le anoanoa’i o tuua’iga ia ua oo atu atu faasaga ia Bakulich ona o lea ua toe tatala pe ua toe faaauau suesuega a leoleoo i lenei mataupu ina ua agai atu nisi lipoti mai aiga ia na latou ta’ua le faavaleaina o i latou.
O le tulai mai o lenei faaletonu i le auaunaga a le Tipene Funerals ua faailoa mai ai foi le aveese e le TVNZ o le ata faasolo le The Casketeers lea sa faaautu atu i lea falemaliu, mai ana ața faaali i luga o le on-demand TVNZ+ ona e tele vaega o lenei ata o loo iai lē o loo agai iai tuua’iga ua faia ai nei suesuega a leoleo.
O le a tulituliloa pea le faagasologa o lenei mataupu, aemaise foi se avanoa o loo taumafai e maua ai se tala lē o loo agai i ai nei tuua’iga.
