Ua toe afea lo tatou atunuu e le polokalame fesoasoani tau soifua mālōlōina a le malo o Amerika ua faaigoaina o le Soifua Manuia Medical Mission.
O le vaiaso atoa lenei mai le Aso Gafua e oo i le Aso Toonai o loo galulue ai foma’i ma tausi soifua mai lea mālō e ofoina togafitiga mo soo se gasegase e aunoa ma se totogi.
O le maota gasegase i Motootua, faapea falema’i faaitumalo i Poutasi Falealili, Leulumoega ma Faleolo o loo galulue ai ia foma’i ma tausi soifua mai lea malo tele.
O loo maua foi lea auaunaga tau soifua mālōlōina i falema’i faaitumālō i Savaii i le maota gasegase i Tuasivi ma falema’i faaitumalo i Safotu.
E le’i mamao atu ni masina sa afea ai foi Samoa e lea polokalame fesoasoani ma e to’atele nisi o le atunuu sa maua ai togafitiga i gasegase o loo aafia ai le soifua.
