Ua poloaia nei e le Faamasinoga Maualuga a Samoa le Fofoga Fetalai ina ia faatautoina loa sui tamaitai e toatolu lea ua faamaonia e avea ma sui faipule faaopoopo o le Fono Faitulafono a le Palemene.

O tamaitai ua faia i ai lea faaiuga a le faamasinoga, o sui e toalua a le vaega faaupufai a le HRPP, ia Aliimalemanu Alofa Tuu’au ma Faagasealii Sapoa Feagai ma le sui e toatasi mo le vaega faaupufai a le FAST, le afioga Toomata Norah Leota.

O le faaopoopo ai o nei sui tamaiitai e toatolu, ua atoa ai nei le to’afitu o sui faipule tamaitai i totonu o le Palemene a Samoa i lenei paeaiga, ae ua oo atu ai nei i le to’a 54 nofoa o le Palemene.

O le faaopoopo o sui e toalua o le HRPP ua tulai mai ai nei i le to’a 22 a latou sui auai, ae mo le vaega o loo tulai mai le pulega o le malo, le FAST party, o loo tumau pea i le 31 o latou sui auai, ona o lea ua toe avanoa le nofoa o le Itumalo faapalota a Gagaifomauga Nu. 2 ina ua maliu le afioga i le alii faipule, le afioga Vaele Sekuini.

O le afioga i le Faamasino Sili, Satiu Simativa Perese, lagolago i ai ma afioga i faamasino sinia, Vui Clarence Nelson ma Lesatele Rapi Vaai, o i latou ia na tauaaoina mai le faaiuga i le taeao nei, Aso Lulu, 11 Me.

O lenei faaiuga a le Faamasinoga Maualuga ua ta’ua ai, o afioga ia Aliimalemanu ma Faagasealii o i laua o sui faipule faaopoopo e tusa ai o vaega 44 1a, 44 1a(b), 44 1b o le Faavae. Mo Toomata o le a faatauto o se sui faipule faaopoopo i lalo o le Vaega 1a(b) ma le 44 1e o le Faavae.