O se lipoti pito lata mai o le faalavelave na lavea ai le pasi a le Laumosooi i Malifa i le aso ananafi, ua lipotia i le Leitio Polenisia i le asō i se faamaoniga mai le Komesina o Leoleo, Afioga Auapaau Logoitino Filipo, o lea ua iai se tamā matua ua maliu mai lenei faalavelave.

O le tamā lea ua silia ma le 60 tausaga o lona soifua, lea ua lipotia ua maliu ai, ma e pei ona ta’ua i le lipoti, o nisi o video na pueina tuusa’o mai e nisi na molimauina lenei faalavelave ma faaali i luga o fesootaiga televavave, o loo iloa atu ai le taoto faō o si nei tamā ma lona ulu o loo sau ai le palapala (toto).

E pei ona avatu i lipoti muamua o lenei faalavelave, e toa 27 na auina atu i le falemai mo togafitiga i manu’aga, ae toafā na taofia i potu mo manu’aga tigaiga, lea sa aofia ai ma si tamā ua fano ai nei lona soifua.

E iai foi isi tusitusiga a nisi i luga o le api o foliga o loo ta’ua ai e lē o se taimi muamua lea ua tau aafia ai lenei lava pasi i ni faalavelave, o loo iai foi se tasi na ia pueina le ata o lenei pasi i se aso na toetoe lava a afaina ai foi lana taavale ona o le alu saoasaoa o lenei pasi.

E momoli ai faamaisega i le aiga o si tamā ua maliu mai lenei faalavelave matautia, aemaise foi o aiga uma o nai tagata o le pasese o loo faamanu’alia e le gata i le tino a o lagona ma le mafaufau, i le tulai mai ai o lenei faalavelave sa lei mafaufauina o le a tupu i lea aso ma lea itula.