A o talimalo ai Samoa i taaloga o le Pasefika i le 2019, o le faagatama lenei o le fanafana ‘aū poo le achery na amata tau ai pine auro a le ‘au a Samoa ina ua manumalo ai le tamaitai ia Jill Grete Walter i le vaega o tamaitai.

Ina ua fesiligia le Sui o lenei taaloga Afioga Mua’ausa Joseph Walter i tapenaga a le ‘au fanafana mo Solomona na ia saunoa ai e na o le toalima sui ua filifilia mai mo faalagamaea i taaloga o le Pasefika.

“O le 2019 e toa sefululua le matou ‘au ae peitai o le tausaga nei ua na o le toalima sui taaalo faatasi ai ma le Manager ma le Physio.

“O Jill e lē ao mafai ona auai mai e tauva ona o loo feagai ai ma aoaoga i atunuu e mamao e le o talafeagai foi le taimi o taaloga ma le taimi o ana suega i lenei vaitau.”

“Ae e iai le avanoa e mafai ai ona maua ni pine mo Samoa mai la matou au.”

Na ta’ua ai e Mua’ausa, o le toaitiiti o le fuainumera o le ‘au fanafana a Samoa ona o tulaga e mafai ona ausia.

“O le filifiliina o sui taaalo a le matou foi taaloga e fua lava i le laasaga maualuga e mafai ona ausia.

“E lē tāua foi le toatele o le fuainumera ae ia tāua le tulaga maualuga o le agavaa e mafai ai ona manuia taumafaiga a le ‘au i Solomona.”

O le faamoemoe mo le atinaeina o lenei taaloga i le atunuu na faailoa ai e Mua’ausa o le a agai i aoga le faalauiloaina o lenei taaloga i alo ma fanau.

E toatasi lava le tamaitai ma alii e toafā o le a taumafai i lenei taaloga mo ni pine mo Samoa i taaloga o le Pasefika.