Ua atoa le toafā o tagata ua maliliu mai i se kulupu o tagata na agai mo se taelega i se matafaga i Vitoria ae feagai ai ma ni faaletonu.
Fai mai molimau o lea kulupu o tagata na vaaia e foliga ua faafaigata ona agai ese mai a le vaega sa taeele ai i Forrest Caves Beach i Newhaven i Philip Island i le aoauli ananafi.
O nisi o tagata laveai poo lifeguards na iai i lea nofoaga na fesoasoani ane ia i latou ia ma na agai ane foi le vaega o fesoasoani faavavave ma taumafai galuega laveai i le toafā lea peitai na maliliu lava tamaitai e toalua pe ā ma le tai 20 tausaga ma se alii e 40 tausaga le matua.
O le isi tamaitai pe 20 foi tausaga le matua na ave atu i le falemai mo togafitiga peitai o le taeao analeila na faailoa mai ai ua maliu foi.
Fai mai le faatonu o le Life Saving Victoria o le nofoaga lea sa faamalu ai i latou ia e lē mo taelega ma e faaaogā tele lava e le aufaasee.
