Ua teena e le tofi pulenuu o Lalomanu le susuga Tapagai’a Taupega Amituanai Foa 67 tausaga o le soifua, moliaga e lua a leoleo e fesoota’i i lona saini faamalosi o le pepa lesitala o se suafa matai ae lei faia se saofa’i.
Ua tetee foi i moliaga e 2 e fesoota’i i le taumafai i se gaioiga na ave ai le pepa lesitala o se suafa matai i le ofisa o Faamasinoga o Fanua ma Suafa ae e lei faia se saofa’i, le tasi o tamalii o loo molia faatasi ma le pulenuu, le afioga Manu’alesagalala Enokati Pelo 64 tausaga o le soifua.
O le pepa o moliaga o loo faailoa ai e leoleo o le aso 23 o Oketopa o le tausaga na te’a nei na faatino ai e i la’ua ua molia gaioiga ua tuua’ia ai e pei ona taumafai ai i se auala solitulafono e lesitala le suafa matai o le Amituanai o le afio’aga o Lalomanu.
O le Aso Gafua o lenei vaiaso na toe valaau ai lenei mataupu tau faamasinoga ma tuuina atu ai e le loia o loo tula’i mo ia matai e to’alua a la tali tetee i moliaga.
Ua faatulaga ai nei le masina o Iuni o le tausaga fou 2025 e su’esu’e ai molimau a leoleo ma mau a i la’ua o loo tetee, ae ua faaauau ona tatala i la’ua o loo molia i ni tuutuuga.
