Na patipati ma le fiafia le alii Palemia o Ausetalia ma le to’atele o tagata na iai i le nofoaga e teu ai vaalele poo le hangar i Sini ina ua tulaueleele ma le manuia le vaega faai’u o le autaalo a Ausetalia na malaga atu i le Olimipeka.

O le tausaga ese lenei ua aupito maualuga ai le aofa’i o pine ua ausia e le autaalo a Ausetalia i se Olimipeka lea ua tulaga fā ai i lona tuuaofa’iga atoa o atunuu na auai i le Olimipeka i Paris.

Saunoa le Palemia i le Today Show i lona agaga mitamita e lē gata mo le autaalo ae o le atunuu atoa i lo latou sao i le tapua’iga.

Na ta’ua e Albanese e lē o le autaalo uma na maua ni pine peitai o i latou uma sa fai ma sui o le atunuu e matua’i tutusa lo latou sao ma le auro, ua o latou faamaualuga Ausetalia ma poo le ā lava le i’uga o a latou tausinioga pe auro, siliva pe apamemea pe lei manuia foi taumafaiga, ae ua matuā avea i latou ma mitamitaga o le atunuu.

Na ta’ua foi e le Palemia o le to’atele o nei tagata taaalo e lē o maua ni tupe ia latou taaloga e pei o le lakapi ma isi peitai o loo faatino le tautua ona o le alolofa i le taaloga ma le atunuu.

Puna o Faamatalaga: https://9now.nine.com.au/today/paris-2024-olympians-arrive-home-anthony-albanese-welcomes-champions-in-sydney/abd6d943-4b0b-47cd-adbe-5adabfc8f46d