O lea ua amata ona faaaoga se fesootaiga i luga o telefoni feaveai ua taua o le Tracer App i le faamoemoe a le Matagaluega o le Soifua Maloloina ma le Komiti o Faalavelave Faafuasei aemaise o le Pulega o tagata tafafao mai fafo e taua tele mo le sailia o le fesootaiga o tagata e iloa ai i latou na fesootai i se tasi ua maua i auga o le faama’i le corona vairusi poo le koviti19.
O le afioga i le tamaitai Palemia le afioga Fiame Naomi Mataafa na saunoa i le faalauiloaina o lea auaunaga e fou i Samoa ae o loo faaaoga e nisi atunuu i fafo e pei o Ausetalia ma Fiti faapea Niu Sila.
O le taua o lea fesootaiga ona o alo lava ma tama fanau a Samoa na o latou tapenaina le naunautaiga a iai se taimi e oo mai ai le faama’i i Samoa ae ua iai se tautua e mafai ona saili ai i latou e ono masalomia le fesootai atu i se tasi ua aafia pe ua maua i auga o le Koviti 19.
Taua e Fiame “O le faaaogaina o le Samoan Travel Tracer e faaogaina le Bluetooth i luga o telefoni feaveai e fesootai ai ma le isi tagata o loo faaogaina foi le Travel Tracer. O faamatalaga uma foi e le mafai ona faailoa i soo se tasi lava sei vagana ai le Matagaluega o le Soifua Maloloina”.
Na taua foi “O nei faamaumauga o le a faaaogaina e tulai loa ma faafesootai ai le mamalu o le atunuu ina ia malu puipuia pea Samoa”.
