Ua fautuaina nei e le matagaluega o leoleo falepuipui ma le toe fuata’ina lo tatou atunuu atoa, ina ia faaaogā na o le numela telefoni masani o le 22-222 i le ofisa autū i Apia pe a fia maua se fesoasoani i ni mataupu e mana’omia ai le auaunaga a leoleo.
O ia mataupu e aofia ai foi ma le logoina i leoleo o ni solitulafono ma ni faalavelave.
O se suiga ua ave ai foi le fautuaga i le atunuu atoa ia aua ne’i toe faaaogāina numera o telefoni a ofisa o leoleo i totonu o itumalo o iai lea auaunaga a le matagaluega, ma e lē o faailoaina e le matagaluega i le latou faasilasilaga pe aisea, ae o ā mafuaaga.
Na pau le faaaliga a le matagaluega o se suiga o le a mafai ona vave tali atu ai i soo se mataupu e logoina ai le matagaluega.
E manino i lea suiga fou e pei ona faailoa e le auaunaga a leoleo o mataupu uma ma faalavelave e tutupu e mana’omia ai le latou tautua i se taimi vave i soo se vaega o motu o Savaii ma Upolu, e tasi le numera o le telefoni e valaau atu ai le atunuu ua na o le 22-222 ona maua lea o le fesoasoani.
