O le sailia o ni auaunaga tau faasalalauga e tuuina atu ni ofo i se tau e faia ai le galuega e faasalalau ai vaega autū o le Fono a Malo o le Taupulega e pei o le aso e tatala aloa’ia ai, e na o le tasi lava le kamupani na fautuaina e le komiti a le malo o tapenaina faasalalauga e ave iai.

Ua na o le kamupani i Niu Sila o le MMG lea e tusa ma le 2 tesimale 5 miliona tala le tau na te faia ai lea galuega, peitai e pei ona lipotia ai e le nusipepa o le Samoa Observer, ua na o ata video o nisi o vaega autū o le fono e faatino e lea kamupani ae o le auaunaga atoa tau faasalalauga e pulea ma vaaia e le TV9 a le Malo ma le leitio o le 2AP.

O loo iai nisi o pisinisi tuma’oti tau faasalalauga i televise ma leitio i Samoa latou te lei maua se logo ma se faamatalaga i le tauofoga o lea galuega, ma o le vala lea o loo tuufesili ai pulega o ia auaunaga tuma’oti pe sa uia ta’iala faaletulafono e faatino ai tauofoga a le malo i ni galuega taugata.

I le lipoti a le nusipepa o loo ta’ua ai le tusi a le ta’ita’ifono o le komiti a le malo e gafa ma faasalalauga na fautuaina ai le tasi o le kamupani e ave iai le faasalalauina o le fono ma faia isi galuega tau faasalalauga, ona ua utiuti le taimi o tapenaga.

Na talia e le Kapeneta lea fautuaga ma avea ai le kamupani o le MMG ma auaunaga na te faasalalauina le fono i le aso e tatala ai, faapea le pu’eina o isi vaega o le fono e aofia ai le taunuu i le malaevaalele o ta’ita’i o malo ma latou usugafono aemaise le taunuu o le Tupu o Peletania.