O le aso 24 Aperila e oo i le aso 12 Me ua amata tapunia ai a’oga uma i le Motu i Sasa’e poo Amerika Samoa, ina ua tulai mai le toe amata pepesi le faama’i o le misela i totonu o le atunuu.

O lenei faaiuga sa auaufaatasi i ai le Matagaluega o le Soifua Maloloina (DOH) ma le Matagaluega o Aoga, ona o le fia faamautinoa e mafai ona taofi uma fanauiti i o latou aiga, a o taumafai ai le vaega a le soifua maloloina e faasavali le faiga o tuipuipui o le misela mo fanau a’oga uma.

O se pepa o faasilasilaga aloaia mai le Matagaluega o Aoga lea na aumaia ai lenei faasilasilaga faatasi ai ma se lisi o nofoaga uma ua faatulaga e le Matagaluega o le Soifua Maloloina, ina ia agai i ai le atunuu, mo ni faafesili poo nisi faamatalaga e fia malamalama ai, ma o le a iai iina tausi soifua e faamautinoa ua mae’a uma ona fai tuipuipui o le fanau.