O le ufitia ai i le ao pogisa o le Faatuatuaga Katoliko i le lalolagi ona o le tuumalo i le Aso Gafua o lenei vaiaso o le Faaao o le ekalesia le afioga Pope Falanisisi, ua faailoa faalaua’itele ai e le Faauluuluga o lea ekalesia i lo tatou atunuu le afioga Aki Epikopō Mosese Vitolio Tui le avea o le Aso Sa o lumana’i nei le Aso Sa mulimuli o lenei masina o Aperila, e osia ai e Matāgaluega uma o le Pule’aga a Samoa Apia sauniga o le Misasā Paia e manatua ai le ta’ita’i aoao o le Ekalesia Katoliko i le lalolagi.

E tuumalo Pope Falanisisi ua 88 tausaga o lona soifua.

Le afioga i le Aki Epikopō o le pule’aga a Samoa Apia, afioga Mosese Vitolio Tui.

O auala o fesoota’iga a le ekalesia i lana faletelevise na faailoa ai lea tapenaga e ala i le saunoaga a le afioga i le Aki Epikopō.