E toalua i laua ua taofia nei i le vaavaaiga a leoleo a’o faagasolo suesuega i le fia maua o molimau e faamautu ai moliaga o le lā umia o ni paipa e ula ai le fualaau faasaina o le aisa faapea ma le umia o ni tama’i tagapepa iila na utu ai lea fualaau faasaina.

O i laua ia o se alii 31 tausaga le matua ma se tamaitai 25 tausaga. O le vaveao o le Aso Lua o le vaiaso nei e pei ona faailoa mai i le po anapo e le Sui Komesina o Leoleo le susuga Auapaau Logoitino Filipo na maua ai i le tiute a leoleo na agai ai se taavale e taamilo i vaega eseese o le talafatai i Apia lea alii ma se tamaitai o feoai i se taavale i se vaega o le auala i Lotopa.

Na taofi ma fesiligia e leoleo le mafuaaga o le feoai ae o loo iai a Samoa i tulaga o le vavao ma o loo tapnuia atoa le atunuu ma faapena ona sueina ai le taavale ma maua ai fualaau faasaina o le aisa.

O le isi tulaga na māua ai e leoleo i lea galuega o le pepa faataga e felauai ai le taavale e faapea o se pepa taufaasesē. Faaalia e le Sui Komesina o Leoleo o le taule’ale’a ua taofia nei faatasi ai ma le tamaitai e iai mataupu o loo sailia ai e leoleo ma o ni mataupu lava e fesootai  i solitulafono tau i fualaau faasaina.

E le gata ina molia i laua ia i le umia o fualaau faasaina o le aisa ae ua sauni leoleo e tuu atu ai faasalaga tupe i lo la soli lea o aiaiga o vavao e pei ona tapunia ai le atunuu atoa ona o le faama’i o le Koviti19 ma ona puipuiga.